Кирил Темков

Кирил Темков е роден во Кавадарци во 1943 година, во занаетчиско семејство, учел во Белград и во Скопје, дипломирал (1968) и докторирал филозофија (1982) на Универзитетот во Скопје. Ученик и асистент на проф. д-р Павао Вук-Павловиќ, постдокторски студии кај проф. д-р Александар Грличков во Белград (1983-1987). Асистент, предавач, вонреден и редовен професор по Етика, Естетика, Филозофија на менаџерството, Филозофија на политиката, Еколошка етика, Биоетика, Менаџерска етика, Педагошка етика и Филозофија на образованието при Институтот за филозофија на Филозофскиот факултет во Скопје. Автор е на бројни статии од областа на Филозофијата, Етиката, Естетиката (особено за уметничката фотографија, ликовната и драмската уметност, џезот) и Културологијата, како и на повеќе книги: Основите на еден нов Универзитет (1975), Панорама на естетичките идеи од втората половина на 20-тиот век (1981), Отворен Универзитет (1993), Мито Хаџи Василев - Јасмин (1997), Етика (1998), Етика за младите (1999, 2001; прев. на српски, 2 изд.), Етички речник за младите (1999, 2001, 2004), Етиката денес (1999, прев. на бугарски), Етика за најмладите (2000-2002, делумно прев. на бугарски), Луј Армстронг - Сачмо (2000), Историја на џезот (2002), Етика за децата (2003, делумно прев. на бугарски), Етика за 2 клас гимназија (2004), Етика за 3 клас гимназија (2004), Филозофија за 4 клас гимназија (2005), Етика и љубовта (етика во градинките, 2006), Деловна и професионална етика (со проф. Серафим Томовски, на македонски и албански јазик, 2006), Професионална етика (2011), Етичари - 100 најзначајни философи на моралот (2014), Биоетика за најмладите (2013-2015), Џез - естетика и антропологија (2017).Ги има преведено книгите: Прагматизам од Вилијам Џејмс, Критика на практичниот ум од Имануел Кант, Научна расправа за методот од Рене Декарт, За слободата од Џон Стјуарт Мил, Ецце Хомо на Фридрих Ниче, како и книгите на Павао Вук-Павловиќ, Душан Недељковиќ, Лука Прошиќ, Миленко Пејовиќ и др.Има добиено Награда на град Кавадарци, орден „Академски палми“ на Република Франција и Меѓународна награда „Гоцева мисла“ на фондацијата Македонија презент.