Песни (избор)

Поетот Венко Марковски е роден на 15 март 1915 година во Скопје. Периодот меѓу 1938 и 1941 година е една од неговите најплодни фази во кои ги има објавено следниве дела: “Народни бигори” (стихозбирка, 1938), “Огинот” (стихозбирка, 1938) кои излегуваат од печат една по друга, “Лулкина песна” (елегии, 1939), “Луња” (лирика, 1940), “Гоце” (поема, 1940), “Илинден” (поема, 1940), “Чудна е Македонија”(поема, 1940), “Бие дванаесет” (поема, заедно со спевот “Беаз Куле”, 1941) и др. Меѓу позначајните негови дела кои го афирмираат како еден од најистакнатите поети за време на Народноослободителната борба се: сонетниот венец  “На исток”, епот “Робии” и спевот “Партизани”. Со несмален интензитет продолжува да пишува и по ослободувањето и од тој период се делата: “Климе” (роман во стихови), “Сказна за резбарот”, “Над пламнати бездни” и др. Венко Марковски почина во 1988 година.