Силјан

Ракописот од Зафир Хаџиманов под наслов „Силјан“ е, всушност, извонреден синопсис за стрип, но и за игран филм.
Сценариото е напишано во септември 1992 година во Скопје, а уште на самиот почеток од сценариото авторот вели: „Приказнава се случува во некое - којзнае кое време, на некое - којзнае кое место“. 
Како во сон се редат и нижат една по друга новите сцени и премрежиња во сценариото на Зафир Хаџиманов за легендарниот, обнародениот, фантастичниот лик Силјан Штркот.
И, така, сè до последната сцена се ројат и бројат сцените од едно сериозно, постапно и прегледно сценарио, кое по публикувањето сигурно ќе биде и послужи како подлошка за стрип или игран филм, кој повторно на еден нов и оригинален начин ќе ја оживее повеста и сагата за македонскиот фантастичен и универзален лик Силјан Штркот, со неверојатна, космополитска, па би рекле дури и планетарна траекторија и судбина.
Силјан Штркот е светски лик, изнедрен на нашиве простори и од нашиот автор-запишувач и собирач Марко Цепенков, а сега еве веќе облагороден и надграден и од Зафир Хаџиманов.
Со особена чест и задоволство сметам дека треба да се поддржи овој редок, уникатен и траен ракопис, за негово понатамошно транспонирање во стрип, филм или друга уметничка рожба и творба.

проф. д-р Христо Петрески