Легенди и преданија

Прераскажани, уште поточно одново пресоздадени македонските легенди и преданија во едно ново време и со македонскиот литературен јазик како магичен знак на македонската опстојба, препознавање и непокор, се нудат за широкиот круг на читатели и вон од научната мисла и интерес, како понуда за убава лектира од најмладите до највозрасните. Се менуваат времињата. Годините брзо минуваат. Се менуваат и луѓето, па посакавме во тие минувања и разминувања да придодадеме по нешто во трајноста на пишаната реч. Книгата “Легенди и преданија” се нурнува во потрага по дел од најубавите приказни на безимениот народен гениј, кои послужиле како материјал за понатамошна авторска надградба. Јазикот на народниот раскажувач има чудесна, магична моќ, чистота и едноставност. Во легендите и преданијата среќаваме неизмерна убавина, добрина и мудрост, како и бројни ликови и карактери, настани и случки, кои заедно претставуваат трајно и непроценливо богатство.